بالصور .. سوق الخضار يكشف فضايح كبار المسئولين في القليوبية

 سوق الخضار يكشف فضايح كبار المسئولين في القليوبية 

عشرات السيدات يستغيثون ب"الرئيس" السيسي لإنقاذ أولادهم و أسرهم من التشرد

رئيس مجلس مدينة شبين القناطر و نائبه يجبرون " الصعيدي " على إلقاء نفسه و ابنته من البلكونة

نقل السوق و اغتصاب أملاك السكة الحديد و توزيع الباكيات على المحاسيب و إهدار المال العام أهم الجرائم

اشتباكات بين نائبي البرلمان  الصفتي و القمار و أمن المستشفى لمنع النواب من التحفظ على دفتر الأطباء الوهمي

الصفتي  : لا يوجد طبيب واحد في مستشفى عام وزير الصحة يا إما يشتغل يا نقفلها أحسن

 تحقيق محمد أمين 

صرخة استغاثة أطلقتها عشرات السيدات بمدينة شبين القناطر محافظة القليوبية من النساء المعيلات اللاتي يأوين و ينفقن على مئات الأطفال الجوعى و المرضى يطالبون بتدخل الرئيس السيسي لانقاذهم من فساد مستشري بمجلس المدينة دون رقيب أو عتيد و أطلقت الصرخة بقفزة الموت التي قام بها محمد الصعيدي أحد البائعين الذي تم دفعه لمحاولة الانتحار و القفز بابنته من الدور الثاني بمجلس المدينة ليطلق صرخة عالية لتصل إلى كل صاحب ضمير في هذا البلد

محمد موسى الشهير بمحمد الصعيدي أحد البائعين في سوق الخضار و الفاكهة الموجود في المدينة من 15 سنة تقريبا مر عليه موظفو مجلس المدينة منذ عام كامل و أخبروهم أنه سيتم نقل السوق إلى الشارع العمومي على شريط السكة الحديد و أن على الباعة سرعة التوجه للمجلس للحجز .

تقدم محمد و أبوه و قاموا بحجز باكيتين و سددوا الرسوم 1000 جنيه و كما يقول محمد لأنه لم يفتح مخه مع موظفي المجلس رفضوا تسليمه الباكية هو أو أبوه و أخيرا تشابك مع رئيس المدينة و نائبه الذين أجبروه على القاء نفسه من البلكونة بابنته الطفلة الصغيرة .

من داخل المستشفى العام بشبين " قامت الاخبار المسائي" بالتواجد مع المنتحر الفاشل في الموت " محمد الصعيدي " لم نجد أطباء و لا تمريض و لا شيء سوى المبنى فقط و كبار قيادات مديرية الأمن بمحافظة القليوبية .

انفردنا بلقاء مع الحالة : و سألناه عن سبب انتحاره و لماذا عرض حياة ابنته للخطر فقال : لم أحاول الانتحار أنا بقالي 3 أيام يوميا أحضر لرئيس المجلس و نائبه أطالب بالحصول على باكية في المكان الجديد لأنه حقي أنا أول واحد حاجز أنا و أبويا و فوجئنا إن موظفي المجلس عايزين مننا رشوة بتفتيح مخ و أنا راجل بصرف على 5 بنات و أمهم و أبويا و أمي و نفس الموظفين دول بينزلوا يدمروا بضاعتنا في السوق القديمة اللي بقالنا فيها 15 سنة و مش معانا قرش زيادة لدفع رشاوي لحد .

أضاف محمد الصعيدي ذهبت للنيابة العامة في شبين فطلب مني أمين الشرطة التوجه لمكتب المحافظ لأن النيابة ليست جهة اختصاص و فعلا ذهبت للمحافظ و قابلنا سكرتير عام المحافظة و عرف القصة و أرسل فاكس من مكتبه بسرعة تسليمي المحل أو الباكية كما يطلقون عليها لأني أول الحاجزين بينما غيري لم يحجز و استلم .

و قال الصعيدي : أعطاني السكرتير العام نسخة من الفاكس توجهت بها للمجلس فقالوا لي روح خد الباكية 32 دي بتاعتك روحت لقيت ناس تانية مستلمنها من المجلس و عاملنها قهوة و رجعت تاني المجلس و طردني رئيس المدينة و نائبه من المجلس و أنا كنت شايل بنتي على ايدي و قولت لهم أروح فين انا و بناتي أروح أموتهم و اموت نفسي عشان ترتاحوا قالوا روح و غور في داهية و أنا شتمتهم و هما شتموني و جري ورانا موظفين و انا وقفت بجوار السور و قولت اللي هييجي جنبي هموت نفسي جريوا ورايا و زقوني ووقعت أنا و بنتي و دلوقتي بعتوا لي ناس قالوا لي مش تتهم حد في النيابة و أحنا هنديك باكيتين أنت و أبوك و الحمد لله البنت مش ماتت و جت سليمة .

بسؤال الطبيبة الوحيدة الموجودة بالمستشفى أكدت أن محمد تحت الملاحظة بالمستشفى 24 ساعة و انه من المفترض عمل أشعة له على المخ لكن الجهاز عطلان .

بعد قليل جاءت قرارت النيابة العامة بنقل محمد على سرير متحرك و سيارة اسعاف لمقر النيابة العامة لأخذ أقواله و فعلا تم نقله وسط اعتراضات من أهله خوفا على حياته .

و داخل مقر النيابة العامة تطوع أحمد صابر محامي للدخول مع محمد الذي استجاب لضغوط رئيس المدينة و غير أقواله و لم يتهم أحد و أكد أنه هو الذي سقط أثناء الشجار مع مسئولي المجلس .

و عاد محمد من جديد إلى المستشفى ليتم نقله لعيادة خارجية خاصة لتلقي العلاج ثم العودة للمستشفى مرة أخرى .

و في المساء حضر للمستشفى عضوي مجلس البرلمان مصطفي القمار و عبدالعزيز الصفتي نواب مدينة شبين في زيارة ل " الصعيدي"  ويتعهدان بإعادة حقه المسلوب من قبل مجلس مدينة شبين القناطرللاطمئنان على حالة الصعيدي و لم يجدوا طبيبا واحدا بالمستشفى و اشتبكوا مع العمال الذين حاولوا منع النواب من النظر في دفتر الحضور و الانصراف الوهمي للأطباء .

و انفعل النائب الصفتي على العمال الذين حاولوا منعه و قال : فين وزير الصحة اللي سايب المستشفى من غير إدارة و لا طبيب واحد يا إما يشتغل يا نقفلها أحسن .

و على باب المستشفى تجمع عشرات الأهالي فور علمهم بوجود " الأخبار المسائي" و كشفوا حقيقة المأساة و الفساد الغارق فيه مجلس المدينة ...

عشرات السيدات أطلقن صراخ الاستغاثة بالرئيس السيسي منهم فاطمة عبدالله بدر و منال محمد منصور و نجية السيد ابراهيم و نورا الطوخي و آية جمال فاروق و امل ابراهيم سعيد و هبة ابراهيم و سامية حامد و صباح محمد سلامة و زينب محمد عبدالعزيز و صباح على خليل و أم هاشم محمد ناجح و اميمة محمد فتحي .

فاطمة عبدالله بدر الشهيرة بأم هاني قالت : بتوع المجلس طلبوا مني دفع فلوس عشان احجز باكية و فعلا دفعت 1000 جنيه في مجلس المدينة و روحت أستلم زي ما ناس كتير استلموا فقالوا لي اسمك لسه ماجاش خليكي الدور الجاي و فعلا ناس تانية استلمت روحت المجلس قالوا لي : مالكيش حاجة و طرودني و رجعت للسوق القديم تاني و جت حملة شالتنا و انا وقفت ضد رئيس المجلس و قولت فين فلوسي قال لسواق البلدوزر دوس عليهم و شيلهم من هنا و الشرطة انسحبت و البلدوزر فعلا دخل عليا و عورنا أنا و الناس اللي حاولوا يحموني و قعدت 3 أيام الشرطة رافضة تعمل لي محضر و مفيش علاج في المستشفى حتى جاءني مسئول من حقوق الانسان و معاه محام و عملوا لي المحضر و انا أرملة و بجري على عيلة كبيرة بصرف عليهم .

أمل ابراهيم سعيد : رئيس المدينة أمر بتاع البلدوزر يدوسنا و الشرطة مشيت و سابته و كسروا ايد بنتي و أحنا دفعنا فلوس الحجز و غيرنا لم يدفع و استلم و قالوا لنا إن السوق القديم بيتم نقله بناء على رغبة محمود بدر عضو مجلس البرلمان بتاع حركة تمرد اللي احنا وقفنا معاه في الانتخابات و نجحناه و لما روحنا له ماجبش حق الناس الغلابة اللي وقفت جنبه .

احنا بناكل لقمتنا بالحلال بندور على 10 جنيه في اليوم عشان نلاقي حاجة نأكل ولادنا .

نورا الطوخي : البلدوزر كسر ذراعي و ايدي مكسورة و زوجي راقد بدون عمل و انا بصرف على طفلين و دفعت 1000 جنيه الحجز و ايصال كمان نضافة ب 500 جنيه و روحنا المجلس عشان يسلمون زي غيرنا خدوا منا الايصالات و قالوا الاستلام الأسبوع الجاي و ورحنا على الاستلام طردونا و قالوا مش ليكم حاجة .

نجية السيد ابراهيم فجرت مفاجأة و قالت : الباكيات الجديدة اكتشفنا إنها ملك للسكة الحديد و في قرار إزالة ليها يعني الناس اللي هتسيب مكانها في السوق القديم  و انتقلت للباكيات الباكيات هتتهد و فلوسهم هتروح عليهم و السكة الحديد هتعمل لهم محاضر و قضايا

و قالت نجية : أنا حجزت وحدتين ب 2000 جنيه ووصل ب 500 جنيه و روحنا نستلم قالوا مالكومش حاجة و و أنا بصرف على أسرة كبيرة و الفلوس دفعتها لنايب رئيس مجلس المدينة أمام رئيس المدينة نفسه و أنا اللي شيلت الست الكبيرة من تحت سكينة البلدوزر و رئيس المدينة قال بالنص : " المرى اللي مش تمشي دوس عليها بالبلدوزر " و الشرطة سابته و مشيت و مش سمعوا كلامه و أحنا اتلخمنا في الناس اللي اتعورت .

أضافت : نجية : عايزين الريس يرحمنا من ظلم محمود بدر و مجلس المدينة احنا حاليا بنفرش في شارع جانبي سيبونا في حالنا ده مكانا من 15 سنة كل ست واقفة هنا وراها مأساة " أحنا ناس غلابة يا ريس الحقنا "

هبة ابراهيم : أنا خدوا مني 1000 جنيه ووصل ب 500 جنيه و رفضوا تسليمنا الباكية و سلموا ناس تانية مالهاش علاقة بالسوق و عندي طفلين مرضى واحدة عايزة عملية والولد مريض بقالي أسبوع مش عارفة أعالجه و لا حتى معايا فلوس الكشف بتاعه أنا و أهلي بقالنا 30 سنة في النعناعية و دلوقتي بيطردونا و خدوا فلوسنا و مش عارفين نعمل ايه و لا نروح لمين عايزين نعيش بالحلال مش عايزين نسرق و لا ننهب عايزين نعيش بالحلال .

منال محمد منصور : قدمنا طلب مرة و اتنين عشان نحجز في الباكيات الجديدة لكن رئيس المجلس طردنا و بيطردونا من السوق القديم و مش عارفين نروح لمين رئيس المجلس طردنا من مكتبه و زقنا و جري ورانا و قال علينا بلطجية و حرامية يا ريت حد من الكبار يجي يفتش و يشوف الباكيات اتوزعت على مين في عيلة واحدة واخدة 12 باكية و في ناس استلمت و باعت كمان و ناس من بره السوق خدت باكيات .

آية جمال فاروق : البلدوزر عورني و داس على بضاعتي و لما روحت المجلس عشان أحجز باكية طردونا نروح فين بعيالنا و رئيس المدينة بيقول لبتوع البلدوزر دوس عليهم , بنتي مريضة و عايزة علاج شهري مين هيصرف عينا هما عايزين منا ايه نموت و لادنا و ننتحر عشان يتبسطوا .

أحمد صابر محامي حقوقي يقول : أتولى الدفاع عن هؤلاء الغلابة المطحونين و أقمت باسمهم دعوى قضائية بمجلس الدولة ضد محافظ القليوبية و رئيس مدينة شبين القناطر لالغاء قرار نقل السوق إلى باكيات ملاصقة للسكة الحديد .

يضيف صابر: أولا الأرض ملك السكة الحديد و هي رافضة لهذا القرار و عملت محاضر ضد مجلس المدينة و تطالب بسرعة إزالة التعديات من على أملاكها .

و أنا أتهم المحافظ و رئيس المدينة باهدار المال العام حيث أن تكلفة بناء هذه الباكيات تزيد عن 200 ألف جنيه غير المباني التي يقوم بها الملاك الجدد و عند تنفيذ الإزالة لصالح السكة الحديد يكون جريمة اهدار المال العام مكتملة بالتعمد حيث أن الباكيات الجديدة صادر لها قرار إزالة رقم 164 لسنة 2016 بتاريخ 27 سبتمبر .

كما اتهم أحمد صابر المحافظ و رئيس المدينة بالفساد مؤكدا أن التخصيص يتم بالأمر المباشر للمعارف و المحاسيب و مخالفا للقانون و أكد الدعوى مستعجلة لجلسة 19 أبريل القادم

مشيرا إلى أنه تقدم باستغاثات لجميع أجهزة الدولة دون استجابة .

&&&&&&

بعد نشر التحقيق في " الأخبار المسائي " حصل محمد موسى الشهير بالصعيدي على " باكية " أو محل مقابل عدم اتهام أحد من مجلس المدينة في واقعة سقوطه من بلكونة مجلس المدينة بابنته ..

و مازال الباقون يصرخون ...