وليد سليمان : عقدي هينتهي خلال الموسم دا، وأنا مش لاقي فرصة أحلى من كدا اعتزل.. وكان نفسي نحقق مركز أفضل من كدا، لكن الحمد لله حققنا المركز التالت، ولقيت ستاد فيه كل جماهير النادي الأهلي، فـ دي فرصة عظيمة وتوقيت كويس.
- كلمت الخطيب وأبو تريكة والدكتور عماد وناس بثق في رأيهم، وجالي عقود قبل كاس العالم إني ألعب سنة ونص أو سنتين لكني رفضت لأني مش عايز ألبس تيشرت غير تيشرت الأهلي.. وأنا كنت بس مستني توقيت كويس أعتزل فيه.. والحمد لله التوقيت مناسب جدًا وبشكر ربنا لتحقيقنا مركز كويس.
- لما كلمت الخطيب عن الاعتزال وطلبت رأيه كوالدي مش رئيس نادي، قالي الموضوع يرجعلك لو قادر تكمل كمل، لو مش قادر دا أمر يرجعلك.. فقولتله أنا مش هقدر ألبس تيشرت غير تيشرت الأهلي، قالي خلاص استنى طيب كأس العالم ونقعد سوا وانت تستاهل حاجة كبيـرة وانا عايز أعملك حاجة محترمة.. فكلمته النهاردا وقولتله التوقيت كويس، قالي أنا عارف انك هتكلمني دلوقتي وانا بردو اختارت توقيت كويس.. وقالي بردو الموضوع يرجعلك.. قولتله يا كابتن انا شايف التوقيت تمام، قالي خلاص توكل على الله.
- أنا دموعي نزلت لما شوفت تعليقات الناس على اعتزالي وردود أفعالهم، هي حاجة كويسة جدًا عند جمهور الاهلي وليا علاقة كويسة مع الجماهير لأنهم ندهوني في لقاء إنبي وشجعوني وانا لسه مش لاعب في الأهلي، فالجمهور وقف في ضهري كتير ودعمني كتير، فـ بشكر الجماهير وإدارة الأهلي وبشكر كل اللاعبين اللي عاشرتهم وبشكر كمان عمال النادي كلهم محدش قصر معايا في حاجة.. وانا راضي تماما عن اللي قدمته.
- انا لما روحت النادي الأهلي لقيت ثوابت جوا النادي وفيه حاجات غيرت تفكيري خالص.. قبل ما أروح الأهلي كنت حاسس بنفسي وكنت محقق بطولات، ولما روحت قالولي إحنا عايزين نجيبك بقالنا كذا سنة.. وقالولي انت لسا جديد ولاعب كويس بس رصيدك زيرو ! فـ الكلام دا فرق معايا إني لازم أقدم حاجة، وعاصرت لاعيبة كبيرة زي تريكة وغالي وجمعة وبركات ومتعب ولقيت الناس دي بتهين نفسها في التدريب! طيب لما الأسامي دي بتعمل كدا أنا فين؟ فـ كان لازم اتحمل المسئولية، فـ مواقف زي كدا فرقت معايا وغيرت تفكيري.
- وانا في الجونة عملت ماتش حلو ضد الاتحاد، ولقيت كابتن عماد النحاس وبيقولي حسام البدري بيقول عايزينك، والأهلي كان محتاج باك ليفت قبل ما يجي سيد معوض.. وروحت ولسا هتفق قالوا لا لسا مشوفناهوش كفاية.. فـ روحت بتروجيت عشان كابتن مختار وخدت وعود كل سنة هتمشي هتمشي هتمشي خصوصا إن كان هدفي الأهلي، لحد ما خلاص انهارت من كتر الوعود وروحت المستشفى، فـ مضيت إني ألعب سنة في إنبي وعلى وعد إني بعدها أروح الأهلي، والتزموا بعدها بوعدهم بعد سنة وروحت الاهلي والحمد لله بدأت مسيرتي في الأهلي.
- أنا مش هينفع ألبس تيشرت غير تيشرت الأهلي، ودا كان حلم حياتي إني أعتزل بتيشرت الأهلي.. وأي قرار فني أنا بحترمه.. الحمد لله أنا مبعملش مشاكل خالص في النادي ولا عايز أوصل لمرحلة إني أزعل عشان مشاركش، انا استخرت ربنا وشايف التوقيت ممتاز وراضي على كل شيء عملته، ومفيش أحسن من القفلة دي.
- إحنا واجهنا ظروف صعبة بردو في 2012، ماكانش فيه دوري ولا كاس ومبنشاركش غير في ماتشات أفريقيا وكان فيه أزمة مادية ودا كله بعد حادثة بورسعيد، كان بيقعد معانا الخطيب وحسن حمدي وبيقولوا الظروف الصعبة هي اللي بتبين معدن اللاعب ، والحمد لله فوزنا ببطولة أفريقيا 2012 رغم إننا اتعادلنا في النهائي 1-1 في مصر.
- لما شوفنا لاعيبة المنتخب ممكن ميلحقوش، فكنا بنعمل اجتماعات وبنقول إننا لاعيبة بردو جوا النادي ، وقعدنا مع بعض وقولنا يا جماعة كل حاجة بتتحسب علينا ، إحنا اللي هنلعب ، إحنا في النادي الأهلي نتحمل المسئولية، لازم روح الأهلي تكون اعلى م الفرق التانية.. وفيه مقولة كنت بقولها "حط قلبك في الملعب قبل رجلك"، ولحد ما رجعت لاعيبة المنتخب.. يمكن قعدنا السنة اللي فاتت مع بعض واتعاهدنا إننا هنرجع هنا ونحقق مركز أفضل.. لكن طبعا الظروف اللي حصلت فـ الحمد لله قدرنا نكرر البرونزية، وقعدنا بردو النهاردا واتفقنا إننا لازم نرجع تاني هنا بمركز أفضل.
- إحنا كلنا بنتمرن وبنقول سيب الظروف دي بتاعة ربنا، وزي ما فيه لاعيبة اتصابت ولاعيبة جت مرهقة لكن هو خير لناس تانية زي الشباب اللي اتوجدوا معانا، ولاعيبة تألقت فكله خير الحمد لله.
- ترشيحات فوز الهلال؟
إحنا بنعرف نقفل على بعض كلاعيبة كويس.. وكابتن الخطيب وكابتن غالي قعدوا معانا وقالولنا لاعب الأهلي لاعب شخصية وعنده روح البطل، بغض النظر مين اللي موجود في الفريق.. لاعب الأهلي دايمًا لاعب مختلف! وجوا نادي الأهلي بنتعامل إنه بيت له أسراره وبنحافظ على بعض.. وكانت قعدتنا مع الخطيب وغالي قبل كأس العالم للأندية.
- إحنا كلاعيبة كبـار بنقعد مع الشباب وبنديهم ثقة وبنحاول نطمنه ونقوله انت في وسطنا زينا والعب لعبك، ودا اللي إحنا كمان مرينا بيه لما لعبنا في الأهلي.. وإحنا ثقافتنا في الأهلي بنلعب على المركز الأول دايمًا وتلاقي الثقافة دي عند الكبير والصغير.. وخسارة بالميراس زعلنا بعدها جدًا وأي خسارة في الأهلي بزعل وبتستنى الماتش اللي بعده بسرعة عشان تعوض الخسارة دي !
- أنا راضي عن اللي قدمته وعلاقتي كويسة مع جمهور الأهلي.. أتمنى بس يكونوا راضيين عني.
- موسيماني راجل طموح جاي عارف النادي الأهلي كويس وعايز يعمل اسم وبطولات ودا بيبقى متاح خلال النادي الأهلي، وبالنسبة لقصة الانتقاد ، الطبيعي إن أي حد بيتعرض للانتقاد؛ لأن كل واحد عايز لاعب معين يلعب، جمهور الأهلي مبيحبش الخسارة، الجمهور زعلان إن الدوري راح مننا والكاس راح مننا، ودي شخصية جمهور الأهلي اللي هي شبه شخصية لاعب النادي الأهلي.. مبيحبوش الخسارة !
- كل البطولات جوا الأهلي جميلة وغالية، لكن أصعبهم بطولة 2012 عشان ظروفها.. وأغلى أهدافي بعضها ضد الزمالك، وهدفي ضد الترجي 2012 هو الأغلى هدف بالنسبة لي لأنه كان في نهائي بطولة الشهداء.
- بعد ما نشرت البوست عن اعتزالي، الإحساس كان صعب جدًا لأني حسيت إن الوقت الطويل اللي قضيته كله جوا النادي الأهلي هو وقت قصير جدًا وخلص بسرعة.
تعليقات
إرسال تعليق