صفقة التريليون دولار عاملة قلق من امبارح ، مش فاهم بصراحة ، بس عموماً هي ليها ضوابط معينة لازم نفهمها الاول علشان نتقبل الرقم المرعب ده ☺️
👈 اول حاجة ، ان السعودية والخليج عموماً منغمس في السياسة الأمر-يكية بشكل كبير ، يعني تلاقي دول الخليج مثلاً من اكبر المتبرعين للحزبين في حملات الانتخابات الرئاسية ، وكل دولة خليجية ليها انتماء سياسي هناك ، السعودية مثلاً معروفة انها اقرب للجمهوريين في حين الإمارات تلاقيها العكس ، وهكذا ،
👈 السعودية من اكبر ٥ دول اجنبية بتستثمر في السوق الأمر-يكي ، وأظن السعودية ثاني اكبر مستثمر اجنبي في الولايات المتحدة بعد الصين وبدون احتساب الاتحاد الاوروبي اللي اظن انه مش هيكون سابق للسعودية برضو ،
👈 التاريخ الاقتصادي بين الخليج وأمر-يكا والعلاقات المتبادلة خلت كل طرف منهم روحه في ايد التاني ، انت في امان بسببي وانا برنس بسببك ، هتقرفني زي ما عمل بايدن هروح أتحالف مع الصين وهرفع لك اسعار البترول ، واعمل لك قلق في كل الاسواق الداخلية القائمة على سعر البترول قبل اي مكون تاني ،
👈 الأهداف المستقبلية في العالم وفي الاقليم مرتبطة جداً ، امر-يكا عايزاهم يقودوا الشرق الاوسط ، وهما كمان عايزين يقودوا الشرق الأوسط ، امر-يكا عايزة تتخلص من الجمهوريات العربية والبعد القومي وهما كمان نفس الشيء ، وبيجهزوا المنتج البديل مع بعض في سوريا بمرجعية اسلامية على رواقة ، أمر-يكا عايزة تفتت الدول الشعوبية الكبرى في المنطقة زي مصر وايران وتركيا بعد ما نجحت في تفتيت العراق وسوريا ، وهما هنا اصحاب مصلحة بعيد عن الحب والكره ، لان الدول دي هي التهديد الوحيد الباقي للنموذج الاقليمي المقترح!
طب ليه ترامب رفع الفيزيتا من ٥٠٠ مليار إلى تريليون دولار؟!
لاسباب كتير ، أبرزها هي الفشل التفاوضي لدول الخليج ،
👈 الدول دي مكشوفة استراتيجياً ومش بتعرف تلعب بالبيضة والحجر ، ناس واضحين كده ومتصالحين مع نفسهم ، اللي بيشكل خطر عليهم بيقولوله يا عمي ، مفيش حيل بقى للفرهدة بتاعتنا دي ، واول خطوات الفشل في التفاوض انك تدخل وانت معترف بضعفك وبأفضلية الخصم ، انت كده هتحاسب على كل المشاريب مبدئياً كده ، ده غير اللي هنتفق عليه كمان ، شكراً 🤝
👈 ثاني سبب ادراك ترامب ان الناس دي مش بتتعب في الفلوس ، هي بريمة بترول واضرب ، وحتى بريمة البترول امر-يكا اللي بتبعتها لهم كمان ، يعني مفيش قدرات وطنية ، مفيش قدرة على تاميم مصادر الثروة دي ،
👈 ثالث سبب ، إن المفاوض السعودي لما حب يصيع ويجيب كام مليار دولار من ع النوتة ويحشرهم في النص وسط الـ ٦٠٠ مليار ، قام طالع لهم ترامب وقالهم علينا؟! ، ده احنا اتهرينا ، احنا نجيب اللي ع النوتة ونحطه ع الـ ٦٠٠ مليار دولار يبقى الحساب كده تريليون دولار ، اتفضل ادفع في الخزنة عند مدام مارجريت وهات الإيصال وتعالى اسلم لك قيادة الإقليم ☺️
ندخل ع السؤال الثالث ، ليه هما بيعملوا علينا أسود وع الأمر-يكان يمامة؟!
اقولك لان عندنا نخب رخيصة اوي ، النخب دي ليها سنين مش بس مكشوفة استراتيجياً ، دي بقت تحت الارض ، انت السبب في عملقة الآخرين عليك ، محدش هيعمل عليك نمرة إلا لو حضرتك اديته الفرصة لكده ، نخبنا خلال التلاتين سنة سلام واستقرار للأسف كشفت البلد للخليج ، وكل المسئولين السابقين يا اما وكلاء ليهم يا اما مستشارين عندهم يا اما في نوع من العلاقات الإنسانية مينفعش نقوله ☺️
وده سبب مشاكلهم مع عبد الفتاح السيسي والجيش ، الجيش عنده أدبيات مختلفة في التفاوض ، نتقاسم فوائد مفيش مانع ، تشتري بالسعر العادل مفيش مشكلة ، انما تاخد الحاجة بتراب الفلوس او تخسرني فيها ، نو ، احنا اسفين ☺️
طب اهمية الخبر ده في ايه لينا كمصر؟!!
👈 اتفاق وقف اطلاق النار في غز-ة ،
👈 شكل الاقليم الجديد اللي مؤكد اننا لن نقبل فيه بدور السنيد أو الكومبارس ،
👈 أفريقيا والتحديات اللي فيها شاكب راكب كده لان الخصم بتاعنا هناك هما الطرفين اللي بيتفقوا مع بعض دلوقتي ☺️
الخبر في النهاية هو نوع من الدعايا ، نقوط في فرح وصول ترامب للسلطة ، بداية اتفاق على امور اكبر من السلع والبضائع والاقتصاد عموماً ، وهو مرتبط بالتزامات هتنفذها امر-يكا علشان تاخد الفلوس دي ، والأيام الجاية هتوضح كل حاجة ، نلتقي بعد الفاصل ،
اوعوا تروحوا في اي حتة تانية ☺️😂😂
،،،،،،،،،،،،،،،،، "" "" "،،،،،،،،،،،،،،،،
المهم بقي هل مصر منزعجة من قيادة الخليج للإقليم؟!
أبداً ، ولا مقريفة حتى ، لسبب بسيط ، قيادة الاقليم عملية معقدة مش سهلة ، وخصوصاً ان الخليج ديموغرافياً معندوش القوة البشرية اللي تؤهله للدور ده ، بالإضافة للخلافات الفكرية والدينية بين الأقلية الخليجية والأغلبية الدينية في المنطقة ، ده غير ان دول الخليج بعيد عن الاقتصاد تفتقد لكل عناصر القوة الشاملة ، لا قوة عسكرية ولا قوة ناعمة ولا قوة اجتماعية ولا تاريخية ولا اي حاجة خالص!
مصر تنزعج من قيادة تركيا مثلاً ، ايران ماشي ، وتدخل معاهم في صدام كمان مفيش مشكلة ، ليه ، لانها دول قديمة وكبيرة وعندها بعض مقومات القوة الشاملة ، بعكس الخليج ، عمرنا ما نصطدم بيهم ، لما حد منهم بتعلى عنده الحالة بنجيبه يحضر عرض عسكري في الكلية الحربية بيفوق وبيعقل وبيقول تحيا مصر ٣ مرات وبيرجع بلدهم سليم مفيهوش حاجة ،
وعلى فكرة ، حتى دورهم في افريقيا لما بتطبطب عليهم بيتغير ، هو قيادتهم للإقليم مش خطر على مصر قد ما هو خطر عليهم هما لانه بيزود مشاكلهم بدون داعي ، وللعلم ، هما كل ما تقابلهم مشكلة في الاقليم بيجوا لمصر ويقولوا لها ، هاه ، نعمل ايه يا مصر ، افيدونا افادكم الله ☺️
كتبه✍️
محمد صلاح
#الأمين_الإخباري
تعليقات
إرسال تعليق