#هشام_جمال أنجح طفل في#مصر

 إسعاد يونس غيرت حياته بـ11 ألف جنيه.. و#الخطيب قاله: "إنت ابني اللي مخلفتوش".. و#دنيا سمير غانم وش السعد عليه..

ساب كلية الهندسة بعد 3 سنين دراسة.. وعمل شركة إنتاج وهو طفل.. وفي ظرف كام سنة بقى من أصغر المليونيرات.. وبيرفض أي مسلسل فيه مشاهد خارجة أو إيحاءات.. وجاب أكبر تبرعات للدكتور مجدي يعقوب.. وبيقسم بالله إنه ابتدى م الصفر ومخدش من أهله جنيه.

أسرار لا تعرفها عن هشام جمال

👇

مواليد 93.. وطالب شاطر من صغره.. وكان بيبقى يوم أسود في البيت لما يطلع التاني ع الفصل مش الأول..

بس المزيكا والنت كانوا أهم حاجة ف حياته عكس أهله اللي صمموا يدخل كلية الهندسة

وطبعا مكنش أدامه خيار غير إنه يكمل ف اللي بيحبه جنب الدراسة.. وكان بيألف الأغنية ويلحنها ويغنيها كمان.. 

وبالصدفة القدر بيجمعه بإسعاد يونس.. ووقتها كانت بتعاني من قرصنة الأفلام اللي بتنتجها ع النت.. وسمعت إن فيه واد عفريت في الحكاية دي واسمه هشام جمال.

وقابلته وعجبتها دماغه لدرجة إنها عرفته على ابنها "عمر" وقالتله إنتم عندكم نفس الاهتمامات وأنا عاوزاكم تتكلموا سوا..

وعمر ابنها كان برا مصر وقتها.. ووصلتهم ببعض.

وبالفعل عملوا شركة سوا لشغل الأونلاين. وكان وقتها عنده 16 سنة.

وبعد سنتين بيقرر هشام يشتغل في إنتاج الأغاني.. ويعمل شركة..

وهنا إسعاد يونس بتشاركه عشان تساعده وبتديه 11 ألف جنيه صرفهم علي ستديو وشوية تجهيزات. وكل اللي كان معاه 4 آلاف جنيه محوشهم.. وبيعمل فيديو كليب "فيسبوكي" مع أحمد مكي والكليب بينجح.

لكن النقلة الحقيقية في حياته لما بيقابل دنيا سمير غانم وبيعرض عليها يعملها ألبوم أو حتى أغنية.

ودنيا بتوافق مع إنه يدوب لسه بيبتدي ومحدش يعرفوا.

وبيعملوا ألبوم "قصة شتا".. وبيكسر الدنيا.. خصوصا إن هشام عمل حاجة كانت لأول مرة تتعمل لما نزل الألبوم ع اليوتيوب بس وكل كام يوم أغنية.

ووقتها كانت كل الألبومات بتتعمل ع سيديهات وطبعا بعدها بشوية بتتسرق ع النت.. فـ هشام جاب من الآخر ونزله ع النت ع طول ووفر فلوس التصوير لإن مكنش معاه فلوس أصلا

وحتى دنيا مخدتش منه أجر.. ولا الشاعر أمير طعيمة خد ولا مليم.

ومن بعدها الخير كله جه مع "دنيا".. واشتغل لأنغام وتامر حسني.

وشوية وبقى ينتج مسلسلات لدنيا سمير غانم ويحقق نجاحات كبيرة.

واتحول لمنتج ومؤلف وملحن ومغنى ومخرج وموزع وبيعمل المونتاج كمان.. د غير إنه عمل "بوي باند".. وأول فريق غنائي من المعاقين واسمه wonders

ومن المزيكا للمسلسلات للإعلانات.. هشام بيعمل إعلان بيقلب مصر كلها وهو إعلان ارسم قلب لمؤسسة مجدي يعقوب.

وقدر يجمع أكبر تبرعات في تاريخ المؤسسة كلها.

وفي الإعلان ده اتعرف ع الكابتن محمود الخطيب..

وبعد أول قعدة بينهم عشان الإعلان.. "الخطيب" قاله: ده رقمي كلمني عاوز أقعد أدردش معاك.

ومن ساعتها "بيبو" آمن بيه وبشطارته وخلاه يعمل حملته في انتخابات الأهلي.. ولما نجح خده معاه النادي مستشار لشركة الأهلي للإنتاج الإعلامي.. وعضو مجلس أمناء في مؤسسة الأهلي للتنمية المجتمعية..

وهو اللي بيعمل كل الحفلات التاريخية للنادي.

بس طبعا انشغاله خلى الدراسة في كلية هندسة صعبة..

وبعد 3 سنين قدر يقنع أهله بأنه يسيب الكلية ويروح يدرس حاجة بيحبها برا مصر.

وبالفعل قدم في جامعة ف أوروبا.. وكان بيروح للدراسة أسبوعين ويرجع مصر أسبوعين يتابع شغله.

ورغم كدا نجح بتفوق.. لدرجة إن الجامعة بعتتله طلب رسمي عشان يكمل معاهم ويدرس للطلبة الجداد بعد ما عجبهم مشروع التخرج بتاعه.

وعشان يقفل العداد دخل مجال التمثيل في مسلسل "في بيتنا روبورت".

والمسلسل عمل حالة جامدة جدا.. و"هشام" طلع منه بـ ليلى أحمد زاهر.

والاتنين كانوا زي الإخوات في الأول.. وهو صاحب أبوها وعمره ما بصلها أي بصة فيها مشاعر.. وهي شايفاه أخوها الكبير خصوصا إنه أكبر منها بـ10 سنين

لكن لما قربوا من بعض أكتر كل واحد فيهم شاف التاني هو الشخص المناسب.. لحد ما هشام قرر يعترفلها بحبه ويبقوا أجمل كابلز في الوسط الفني.

#الأمين_الإخباري