كهربا مع#فايق:#الأهلي حلم أي لاعب

 إبراهيم فايق: طيب عايز تتكلم على قصة الغرامة؛ جمعت فلوسها منين؟ إزاي؟ ليه؟ فين؟

 كهربا: خلاص بقى.. يمكن يعني أنا مش عايز أفتكر، لأن لو اتعاد بيَّ الموقف تاني، على البطولات اللي أنا حققتها مع النادي الأهلي والتاريخ اللي عملته ، ممكن أدفع مليارات ، والله العظيم والله العظيم يا هيما والله العظيم ما كلام،، أنا أهلاوي صعب أوي، والله أهلاوي صعب أوي 

 إبراهيم فايق: مصدقك

كهربا: يمكن ضحيت بمستقبلي عشان ألبس تيشيرت النادي الأهلي، مكنش فارق معايا أي حاجة، ولا فارق معايا أي حاجة في الدنيا غير إني ألبس تيشيرت النادي الأهلي وأعمل معاه تاريخ

 إبراهيم فايق: حاسس إنك عملت تاريخ مع النادي؟

 كهربا: الحمد لله وإن شاء الله بإذن الله -إن شاء الله إن شاء الله إن شاء الله- العلم عند ربنا طبعاً، إن شاء الله يكون فيه بطولات تانية بإذن الله برضه

ابراهيم فايق: دلوقتي إحنا لعيبة حرة، أنت لاعيب حر دلوقتي؟ 

كهربا: بشكر كابتن محمود الخطيب، بشكر كابتن سيد عبد الحفيظ على وقفاته معايا، وبشكر طبعاً الأستاذ جمال جبر، أنا والله العظيم يعني يمكن فيه ناس وقفوا معايا ولازم لازم أشكرهم، هم اللي خلوني ألبس تيشيرت النادي الأهلي وأعمل التاريخ ده كله طبعاً، وكابتن أمير توفيق وكمان أستاذ جمال جبر بالأخص عايز أشكره لأن هو دوره مش معلوم للناس

 إبراهيم فايق: ، قولي بيعمل معاك إيه؟ 

كهربا: لا بيعمل مع اللعيبة كلها والناس كلها والله العظيم، اللعيبة كلها والناس كلها، بيقف معاهم وقفاته برجولة وجدعنة وبأمانة زي أولاده ومع الناس كلها، بس بيحب النادي الأهلي حب.. ودوره مش معلوم للناس خلي بالك، كان دوره قوي جداً بس مش معلوم للناس، عشان كدة دايماً إيه.. في الأهلي يقولك إيه: "هو ده الأهلي فوق الجميع"

 إبراهيم فايق: قولي عمل ايه؟

 كهربا: لا بيعمل.. بيعمل معايا حاجات.. ده يمكن من ساعة موضوع الغرامة كان 24 ساعة يكلمني ويطمن عليه ، كابتن سيد عبد الحفيظ ده حبيبي، ده وقف معايا كتير أوي، كنت كل يوم عنده.. من ساعة موضوع الغرامة كنت كل يوم عنده في المكتب 

إبراهيم فايق: عايز ترجع الأهلي؟ نفسك ترجع الأهلي؟ غيرت لك السؤال أهه، نفسك ترجع؟ 

كهربا: يعني أكدب عليك لو أقولك لا، ده حلم أي لاعب، وأنا بالنسبة لي النادي الأهلي ده أصلاً مش هقولك بقى يعني خيره عله وفضله عليَّه، يعني أنا مهما أعمل للنادي الأهلي أنا ماجيش "إبرة"، النادي الأهلي عمل لي وهو ساعدني وخلى يعني كهربا دلوقتي بقى ليه تاريخ وليه اسم والناس كلها عارفاه والله العظيم

إبراهيم فايق: عايز أسألك سؤال في حاجة بتجنني فيكم كلكم بقى، فيكم كلكم.. أنتوا كلكم أصحابي وكلكم حبايبي وأنت عارف أنا بحب الناس كلها والحمد لله على راسي من فوق. أنتوا تبقوا موجودين في النادي الأهلي، يا دوب مثلاً إيه اللعب يبعد عنك شوية -وده طبيعي لأنك بتلعب في زحمة وفي نجوم وفي بتاع- طيب تبتدي تأير تاخد جنب، أنا عايز ألعب، طب أنا عايز أخرج، نخرج؟ خرجنا.. خرجنا بره النادي الأهلي، أول مكالمة تليفون أما أكلم حد فيكم يقول لي: "والله أنا نفسي أرجع النادي الأهلي". طب أنتوا بتخرجوا ليه يا جماعة لما أنتوا أصلاً عايزين ترجعوا للنادي الأهلي؟ ما أنا ما بفهمهاش طب ما أنت موجود أهه، لو على حسب قولكم أنا عايز أرجع الأهلي.

كهربا: مش كلنا يا هيما، مش كلنا

 إبراهيم فايق: شريف خرج، أنا فاكر كويس شريف خرج قابلته في الرياض جوه الهوا وبره الهوا، شريف هيموت ويرجع الأهلي طب يا جماعة ما أنتوا كنتوا بتفركوا عشان تخرجوا لما بتخرجوا بتبقوا عايزين ترجعوا

كهربا: ده ما هو النادي وقف معايا ساعدني إن أنا أروح، ربنا جايب لي خير، وقف كابتن محمود الخطيب وقف معايا، ما دي اللي بحكيلك هو طول عمره بيدعمني، فلما جالي قال لي.. قلت له: "يا كابتن أطلع ست شهور إعارة بنية البيع وخير جالي"، قال لي: "روح ربنا يرزقك وربنا يكرمك"

#الأمين_الإخباري