شرح وتوضيح 📢
بخصوص حكم المحكمه الدستوريه بعدم دستوريه قرارات رئيس هيئة الدواء واللغط الدائر حول قرار معالي النائب العام وبعض الاقلام اللي كتبت ان المتهمين هياخدوا براءه والمسجون هيروح ده خلينا نشرح الموضوع ببساطه في نقط عاديه
١. الاصل في القانون ان مفيش جريمه ولاعقوبه الا بنص والنص لازم يكون خارج بطريقه شرعيه اما كقانون من مجلس النواب او قرار من الوزير المختص او رئيس الجمهوريه .اي حد تاني ممنوع يطلع قرارات بتجرم او بتحظر اي حاجه
٢. جداول المخدرات موجوده فعلا بقرارات من رئيس الجمهوريه ووزير الصحه المختص ومجرمه وليها عقوبات محدده وده امر قانوني
٣. في سنه من السنين رئيس هيئه الدواء طلع قرارات تخص الجداول دي منها شقين مواد تخليقيه مكنش صدر بيها حاجه قبل كده حطها في الجداول دي وبقي معاقب عليها ومواد تانيه موجوده اصلا من فتره بس هو نقلها لجدول تاني اشد في العقوبه
٤. جت المحكمه الدستوريه ودي سلطتها قالت الكلام ده مينفعش لان الراجل ده مش من سلطته يحط حاجات ويشيل حاجات .فقراراته دي كالعدم وملهاش وجود
٥. السيد وزير الصحه بسرعه راح مطلع قرار بالجداول يصحح فيها الازمه دي ويبقي الجداول دي رسميه معتمده
٦.معالي النائب العام طلع كتاب دوري ازاي نتعامل مع القصه دي قانونا في المحكمه والنيابه .وهنا بقي ركز معايا
🖍المواد التخليقيه اللي حطها رئيس هيئه الدواء من نفسه دي بقي ملهاش اساس تجريمي والمتهم فيها هياخد براءه ولو بيتحقق معاه هيخرج ولو صدر ضده حكم نهائي هيتم ايقاف تنفيذ العقوبه ويروح لانه ممسوك بماده مش محظوره كأنه ممسوك بفيتامينات عاديه
🖍الممسوك بمواد تخليقيه او مخدرات كانت موجوده في جدول قديم بس رئيس هيئه الدواء عدل الجدول ونقلها جدول تاني .لاء حضرتك هترجع تاني الجدول القديم والمتهم هيتحاسب علي الجدول القديم فلو كان لسه بيتحقق معاه فالنيابه هتعدل مواد الاتهام حسب الجدول القديم ولو كانت القضيه في المحكمه فأصلا من سلطه المحكمه تعدل الاتهام فالنائب العام أشار للمحكمه انها تستخدم سلطتها وتعدل فبدل ما تبقي العقوبه ٢٥ سنه مثلا ممكن تبقي ١٠ سنين او ٦ سنين ولو القضيه في الاستئناف او النقض المحكمه تتصدي وتعدل الحكم وتقول اننا هنحكم وفقا للجدول القديم
🖍طب لو القضيه صدر فيها حكم نهائي بات والمتهم بينفذ خلاص هنا من حقه يعمل اشكال في التنفيذ ويتمسك بحكم الدستوريه ومحكمه الاشكال تعدل الحكم للمده المحدده في الجداول القديمه
💎 القصه مش قصه ناس خارجه وناس داخله وفيديوهات ع السوشيال من ناس تجهل القانون .القصه لها ترتيب محدد وتسلسل قانوني اتمني اكون شرحته لحضرتك ببساطه
محمد محمد رشوان
#الأمين_الإخباري
تعليقات
إرسال تعليق